Planlagde bustader

Det manglar ikkje på folk som vil bu i Rosendal. Det manglar bustader.

Tanken bak prosjektet på eigedomen Solheim er å gjera noko med nettopp dette.

Det har ved fleire høve vore sett fokus på at mange av dei unge som kjem heim til Rosendal ynskjer einebustader, medan andre vil ha leiligheiter. På den omlag 9 da store sentrumseigedomen vår, har vi difor sett føre oss ei lett blanding av bustader for å imøtekoma behova.

Dei første skissene inneheld åtte moderne og miljøvenlege einebustader med grunnflate på ca. 100m2, ein firemannsbustad med leiligheiter på ca. 70 m2, og to mindre mikrohus på ca. 30 m2.
Oppvarming av husa er tenkt skal koma frå termisk varme, henta frå jord eller grunnvatn.

Vi har lagt vekt på å skapa eit godt bumiljø med gjenkjennbar arkitektur som passar med bygda sin identitet og som høver i omgjevnadane, både i bygningskropp, material- og fargeval. Det er også lagt eit stort fokus på å skapa gode, praktiske og romslege løysingar for å leggje til rette for ulike personar og behov.

Eit mål for alle husa er å bevara gode siktliner mot fjord og fjell. Målsetnaden har elles vore å skapa romslege og naturlege fellesområder utanfor, og det flotte grøntområdet tomtene tilbyr har blitt vektlagt. I det heile er dette tankar som Riksantikvaren har gitt uttrykk for i sitt ynskje for framtidig utvikling av Rosendal.

Desse tankane har vi også spelt inn i arbeidet med den pågåande områdeplanen for Rosendal.

Gjeldande planstatus pr i dag for tomtene og området Øyrane på Malmanger i Rosendal er i Kommuneplan 2018 (planid 20140002): Sentrumsformål.